GUSA GUSA MINI BAND KUTUMBUIZA LONDON

 

KUNDI la muziki wa taarabu la Gusa Gusa linatarajiwa kupeperusha bendera ya nchi katika onyesho litakalofanyika jijini London nchini Uingereza  Februari 7, mwaka huu.

Kundi hilo litakwenda kunogesha maadhimisho ya miaka kumi ya Didas Entertainment na Februari 14  watafanya onyesho katika mji wa Northampton nchini Uingereza.

Ziara ya Gusa Gusa Mini Band imeandaliwa na Kampuni ya Didas Entertainment yenye maskani yake nchini Uingereza.

Akizungumza kwa njia ya simu, Mkurugenzi wa Didas Entertainment, Khadija Seif ‘Didas’,mwenye maskani yake Jijini London  alisema kwamba maandalizi yamekamilika na pia bendi ya Gusa Gusa ambayo tayari wamekamilisha albamu yao ya kwanza  inayokwenda kwa jina la ‘Unajidodo Linakuchukucha’.

Aidha, tayari bendi hiyo kwa sasa inatamba na vibao vyao viwili vilivyomo katika albamu hiyo ambavyo ni ‘Unajidodo Linakuchukucha’, wimbo ulioimbwa na mwimbaji mkongwe wa mipasho nchini, Afua Suleiman, almaarufu kama B52.

Kibao kingine kinakwenda kwa jina la ‘Mapenzi Hayana Fomula’ kilichoimbwa na Mkongwe Sabaha Salum Muchacho ‘Beauty Queen’.

Nyimbo zinazotarajiwa kupakuliwa hivi karibuni ni pamoja na ‘Azurure’ utakaoimbwa na Mzee Sultan na ‘Mwanangenzi’ utaimbwa na muimbaji chipukizi, Asya Maryam.