COCODO BENDI YA VIJANA ILIYOKONGA KATIKA TAMASHA LA SAUTI ZA BUSARA

 Wasanii wa bendi ya Cocodo wakiwa jukwaani ambao hupiga muziki wao katika miondoko ya asili

Picha Zote na  Sauti za Busara.

 

Cocodo watoto wa Kinondoni waliopania  muziki wa Asili

BENDI ya muziki wa dansi wa asili ya Cocodo (Cocodo African Music Band) wametoa wito kwa wanamuziki wa hapa nyumbani kujifunza zaidi muziki kuliko kuingia katika muziki kwa kusema kwamba tuna kipaji.

Kuwa na kipaji sawa lakini kipaji bila kusoma kamwe muziki wa hapa nyumbani hautafanikiwa kusonga mbele na kuwa wa Kimataifa.

Cocodo ambao walionyesha vipaji vyao katika tamasha la Sauti za Busara  siku ya sikukuu ya Wapendanao(Valentine Day) kwenye tamasha hilo lililofanyika katika viwanja vya Ngome Kongwe Zanzibar.

Hayo yalisemwa na Kiongozi wa bendi hiyo Remigius Sostenes kwamba hii ni mara ya kwanza kwa bendi hiyo kupata fursa ya kutumbuiza katika tamasha hilo la 12 la Sauti za Busara hivyo wakajiandaa kuitumia fursa hiyo kwa kujitangaza kwa sababu katika tamasha hili kuna wadau mbalimbali kutoka katika mataifa mbalimbali kutoka nje ya nchi ambao hufika kuangalia vipaji na wengine kupeleka  sifa nzuri za wasanii ambao waliweza kuwaona katika tamasha na kuvutiwa kufanya kazi nao kwa kuwatumia mialiko.

“Hapa tuko sokoni hivyo na sisi tulipopata taarifa kwamba tutakuwa miongoni mwa washiriki tukajiandaa kujitangaza kwa kutoa burudani nzuri kwa wahudhuriaji” anasema Sostenes.

Akizungumzia jinsi bendi yao ilivyoanza anasema kwamba bendi hiyo ilianzishwa na wasanii wachache lakini kadri siku zilivyokuwa zikisonga mbele bendi iliongeza idadi ya wasanii ambao wote waliokuwa wakiomba kujiunga nao walikuwa na vipaji.

“Tulianza kufanya sanaa ya muziki bila kuusoma hiyo ilikuwa 2010” anasema Sostenes.

Changamoto za bendi

Kwa upande wa changamoto Kiongozi huyo anaweka wazi kwamba kipato ni kikwazo kikubwa kwao lakini hawakati tamaa huku wakijaribu kujikwamua na kupambana na changamoto hizo.

“Ilifika wakati tukawa tunakata tamaa  ya kuendelea na bendi  lakini dhamira ikatushinda hivyo tukaamua wote kwa pamoja kutokata tamaa katika sanaa huku tukiwa na imani kubwa kwamba ipo siku tutafika mbali na kufanikiwa” anasema.

Aisha anaongeza kwa kusema kuwa  wamekuwa wakipata mialiko ya kushiriki katika matamasha mbalimbali nje ya nchi lakini wamekuwa wakishindwa kwa sababu wamekuwa wakiambiwa wajigharamie kwenda na wakifika watarudishiwa gharama zao walizozitumia lakini wamekuwa wakishindwa kufanya hivyo kwa sababu ya kukabiliwa na ukata.

“Tumekuwa na kiu kubwa ya kushiriki kwenye matamasha hayo  makubwa lakini tatizo ukata ndiyo unaotukwamisha na kushindwa kushiriki kwenye matamasha ya Kimataifa duniani hivyo tunaomba mashabiki na wadau watusaide”anasema Sostenes.

Anaainisha  matamasha ambayo waliwahi kushiriki ni pamoja na tamasha la nchi za Majahazi Ziff  waliloshiriki kwa misimu miwili Karibu Festival lililofanyika Wilaya ya Bagamoyo Mkoani Pwani.na

Aidha anaongeza kwamba hawana wafadhili wa bendi yao hivyo wamekuwa na utaratibu wa kusapotiana wenyewe kwa wenyewe ambapo mwenzao akikwama kwa njia moja ama nyingine huwa wanamsapoti kwa hali na mali bila kuchoka na hiyo ndiyo siri kubwa ya wao kuweza kufika hapo walipo hadi hivi sasa.

Anaendelea kwa kusema kuwa lengo lao kubwa ni kuweza kufika mbali katika tasnia ya muziki na kuitangaza nchi kwa ujumla kwa kupitia matamasha makubwa  ya kitaifa na kimataifa.

Nini kilichowavutia bendi ya Cocodo  kuimba muziki wa asili?

Sostenes anasema kutokana na umri walio nao wangekua wamebobea katika kuimba muziki wa kizazi kipya Bongo Fleva  lakini wamejikita katika muziki wa asili kwa sababu moja kuu ni kutafuta  lebo ya asili katika muziki wanchi hii.

Kabla ya kuamua kuimba muziki katika miondoko ya muziki wa asili tulikuwa tukipiga  miziki mbalimbali ya kukopi lakini mwisho wa siku ndipo tukaamua kupiga aina moja ya muziki ili iwe rahisi kutambulika zaidi kama jinsi ilivyo hivi sasa anasema Sostpeter.

Bendi ya Cocodo   inapiga muziki wake katika mahadhi ya Kitanzania na Kiafrika pia hupiga muziki wa aina ya Jazz  huku mtindo wanaopiga muziki wao wakiuita kwa jina la ‘Panyenje Style’ maskani yao ni  maeneo ya Mahakamani  Kinondoni Jijini Dar es Salaam.

Historia fupi ya bendi ya Cocodo

Bendi hii ya Cocodo  ilianzishwa 2010 na  katika nyimbo zao wamekuwa wakitoa ujumbe mbalimbali zinazohusu  mafunzo kwa jamii kutoa tahadhari ya mambo mbalimbali yanayoikabili  jamii ikiwa ni pamoja na magonjwa kama vile Malaria na Ugonjwa wa Upungufu wa Kinga Mwilini (HIV),vilevile huimba kuhusu ukuaji wa uchumi wanchi.

Ala za muziki wanazotumia ni pamoja na zile za asili kama Marimba,Djembe,Zeze huku ala za kisasa ambazo ni gitaa, kinanda.