MANISPAA YA KIBAHA YATENGA MIL. 30 UJENZI WA KITUO CHA POLISI KATA YA VIZIWAZIWA

 

Halmashauri ya Manispaa ya Kibaha imetoa kiasi cha Shilingi Milioni 30 kwa ajili ya ujenzi wa Kituo cha Polisi Kata ya Viziwaziwa ambacho kimeanza 2023 kwa nguvu za wananchi wa Kata hiyo pamoja na wadau wa maendeleo.

Akifungua ujenzi wa Kituo hicho sambamba na Harambee ya ujenzi, Mstahiki Meya wa Manispaa ya Kibaha Mhe. Dkt. L Nicas Mawazo amezindua ujenzi wa kituo cha Polisi Kata ya Viziwaziwa kilichoanzishwa kwa nguvu za wananchi na kuwapongeza wananchi hao kwa kuanzisha mradi huo wa kimaendeleo na kuchangia mabati 500 kwa ajili ya kupaua kituo hicho ili kuweze kuanza kutoa huduma kwa wananchi.

Dkt Nicas amesema kituo hicho kitagharimu zaidi ya milioni 260 za kitanzania ambapo amewaahidi Halmashauri ya Manispaa ya Kibaha itaendelea kutenga fedha za kutoshakwa ajili ya ujenzi wa kituo hicho na anatamani hadi kufikia Julai 2027 kiwe kimeshakamilika.

Amesema, kwa wakati mwingine wananchi wamekuwa wanaibua miradi, na kisha serikali inakuja kumalizia miradi hiyo.na katika ujenzi wa Kituo hicho wananchi wamechanga takribani kiasi cha milioni 12 na bado wanaendelea kuchanga.

Naye, Diwani wa Kata ya Viziwaziwa Mhe. Mohamedi   Chamba ameishukuru Rais wa Jamhuri ya Muungano wa Tanzania Dkt Samia Suluhu Hassani kwa kuendelea kuboresha maisha ya watanzania na kuleta fedha kwa ajili ya ujenzi wa miradi mbalimbali, pia amemshukuru Mstahiki Meya wa Manispaa ya Kibaha Mhe. Dkt Nicas Mawazo kwa kuchangia mabati 500 kwa ajili ya kupaua Kituo hicho cha Polisi.

Aidha amemshukuru Mbunge wa Jimbo Mhe. Silyvestry  Koka na kuwaomba wadau wa maendeleo waendelee kuunga mkono juhudi za serikali ili kufanikisha kumaliza ujenzi wa kituo hicho cha Polisi.

Katika harambee hiyo, Waheshimiwa madiwani kutoka Kata ya Misugusugu Mhe. Ally Mwinyi Simba na Diwani Kata ya Visiga Mhe. Saidi Mpaki waliweza kufika na kushiriki hafla hito na kuahidi watahakikisha kituo hicho kinamalizika ndani ya muda aliosema Mstahiki Meya kwa kuwaleta wadau wa maendeleo kuweza kuchangia.

Baadhi ya wananchi wa Kata hiyo wamefurahj kuona kero yao ya muda mrefu ya kutokuwa na kituo cha Polisi inaenda kuisha, wamempongeza Mstahiki Meya kwa moyo aliouonesha wa kufanya harambee na kupatikana kwa kiasi cha Tsh 900,000 , tofali 750 na mifuko ya saruji 10.