KILIMO CHAGEUZWA UTALII NCHINI CHINA

 Meneja wa shamba mojawapo katika Kijiji cha Xingyi Chen Xian Juan  , Mkoa wa Guiyang, akionyesha maharage aina ya 'Snake Beans', moja ya zao katika shamba lake yenye urefu zaidi ya kimo cha mtu.

  Meneja  wa  Shamba  hilo Juan akionyesha boga ambalo limevunwa kwenye moja ya mashamba yao ya kitalii mjini Xingyi China (Picha  zote na Khadija Kalili aliyekuwa China).

 
 Matayarisho ya  kuapnda mazao mapya yakiendelea.

Mkulima akisafisha shamba kama alivyokutwa na mpigapicha wetu.

NA KHADIJA KALILI, ALIYEKUWA CHINA

HOJA kwamba kilimo ni uti wa mgongo wa uchumi wa Tanzania, imebaki katika mizania ya nadharia zaidi kuliko vitendo.

Japo imekuwapo misamiati mingi yenye kuvutia inayotolewa na serikali kuonyesha inavyojali sekta ya kilimo kama ‘Kilimo Kwanza’ na mingineyo, ni ukweli wa mambo yote hayo yamebaki katika makabrasha tu.

Ukweli wa haya yanathibitishwa na namna serikali ilivyoshindwa kujali kwa vitendo sekta ya kilimo ndio maana leo hii soko la mazao mengi kama kahawa, pamba, korosho, imekuwa haina uhakika huku wakulima wanaothubutu kulima, huishia kukopwa.

Anayebisha haya, kaulize mfumo wa stakabadhi ghalani unavyowatesa wakulima katika maeneo mbalimbali ya nchi huku wajanja wakinufaika kwa kujenga ‘mahekalu’ ya kifahari kwa fedha za wakulima waliobaki katika dhiki.

Kitendo cha nchi kushindwa kuwekeza katika kilimo ambacho kingeweza kusaidia ukuaji wa uchumi kupitia uuzaji wa mazao nje hivyo kuingiza fedha za kigeni, ni moja ya vigezo vya kushuka kwa thamani ya shilingi ya Tanzania.

Kwamba, nchi imekuwa ikiagiza zaidi nje kwa kutumia dola ya kimarekani kuliko inavyouza, jambo ambalo lingeweza kupunguzwa kwa kuwekeza katika kilimo ambacho kingeboresha uchumi wa wakulima hadi taifa.

Wakati hali ikiwa hivyo kwa Tanzania, hali ni tofauti nchini China ambapo kilimo kimejengewa mazingira bora kiasi cha kuwa sehemu ya utalii.

Mwandishi wa makala hii aliyekuwa miongoni mwa waandishi waliofanya ziara ya mafunzo  nchini China, aliweza kujionea mengi katika sekta hiyo ambayo imekuwa na tija kubwa kwa wakulima.

Wanahabari wajionea mashamba ya mfano ambayo huyatumia kama sehemu ya kuwaongezea kipato  wakulima.

Kwa mujibu wa Chen Xian Juan, meneja wa shamba la mfano katika kijiji kimojawapo, anasema utalii huo wa kilimo, umekuwa  ni kivutio kikubwa kwa wa wageni wanaofika katika mashamba hayo ya kitalii  kujionea namna ya kulima kilimo cha kisasa na chenye manufaa.

Anasema, mambo yanayopatikana katika siku za maonyesho hayo ni pamoja na kuogelea, nyama choma na maonyesho ya mazao yao ambayo hulimwa na wanakijiji.

Aidha, wanahabari waliweza kushuhudia mashamba ya mfano yaliyopo vijijini na kuwaona baadhi ya wakulima wakiendelea kutumia jembe la mkono, lakini wengine wamekuwa wakitumia trekta pamoja na zana za kilimo za kisasa.

Juan anasema baada ya mazao kwa mfano matunda na mbogamboga kuvunwa, hufanyiwa utafiti wa kutosha kama yanafaa kuliwa na binadanu kabla ya kusafirishwa kupitia kwa mawakala maalumu waliopo maeneo ya mijini kwa ajili ya kuyasambaza kwenye masoko ya miji ya China.

Katika mji wa Xingying, wanahabari ulishuhudia pia mazao yaliyostawi vyema kama mahindi, maharage, viazi, magimbi, maboga, pilipili-hoho na jamii nyingine za mbogamboga ambapo sasa wanajipanga kuanza kuuza kwa njia ya mtandao.

Je, nini siri ya mashamba yenye rutuba?

Juan anasema katika mji wao, wamekuwa wakijitahidi kupambana na uharibifu wa mazingira, hivyo wako tofauti na Beijing ambako hali yake siyo nzuri kutokana na kuharibiwa na utitiri wa viwanda.

“Hali ya hewa kwetu (Xingying) ni nzuri na iko tofauti na mji wa Beijing kwani mazingira yake yameharibiwa na viwanda na kemikali, hivyo hata ardhi yake haiwezi kumea kitu,” anasema Juan.

Anasema, licha ya kufanikiwa kutunza mazingira ya eneo hilo, pia hutumia mbolea ya asili kwa mfano kinyesi cha wanyama kwa ajili ya kuongeza ubora wa mazao mashambani.