SHEIKH PONDA APASULIWA NGIRI

Katibu  wa Jumuiya  na Taasisi  za Kiislamu , Sheikh Issa Ponda akisoma  gazeti  la Tanzania Daima nyumbani kwake  Mabibo Jijini Dar es Salaam jana,(Picha na Francis Dande).

NA KHADIJA KALILI

AFYA ya Katibu wa Jumuiya na Taasisi za Kiislamu, Sheikh Issa Ponda, inaendelea vizuri baada ya kufanyiwa upasuaji wa henia Desemba 6, mwaka huu.

Hivi sasa kiongozi huyo mwenye wafuasi wengi waamini wa Kiislamu yupo mapumziko nyumbani kwake Mabibo jijini Dar es Salaam.

Akizungumza na Tanzania Daima Jumatano iliyomtembelea nyumbani kwake, Sheikh Ponda alikiri kufanyiwa upasuaji huo kwenye Hospitali ya Tabata General na kubainisha kwamba ugonjwa huo ulimuanza miezi sita baada ya kuswekwa mahabusu katika Gereza la Segerea jijini humo.

“Ni wiki mbili zilizopita ndiyo nimefanyiwa upasuaji huu… nimeshatolewa nyuzi na hivi sasa nauguza kidonda tu kama unavyoniona.

“Nilianza kupata maumivu makali nikiwa Gereza la Segerea, zipo taratibu za kufuatwa ili mfungwa au mahabusu apelekwe hospitalini. Nilizifuata lakini nikagundua kulikuwa na urasimu ndiyo maana sikupelekwa hospitali,” alisema Sheikh Ponda aliyewahi kuitikisa serikali kutokana na misimamo yake ya kutetea Uislamu.

Baada ya kuachiwa huru na Mahakama ya Mkoa wa Morogoro Novemba 30, mwaka huu, siku mbili baadaye Sheikh Ponda alikwenda hospitali ambapo daktari wake alimshauri afanyiwe upasuaji ili kumnusuru na maumivu yaliyosababishwa na henia hiyo.

“Daktari alisema nimecheleweshwa sana kuanza tiba lakini namshukuru Mwenyezi Mungu upasuaji ulikwenda vizuri na nimekwisha kuondolewa nyuzi… hapa natibu mshono tu,” alisema.

Alisema akiwa gerezani hakuchoka kuomba ruhusa ya kwenda hospitali kwa matibabu lakini jitihada zake hazikufanikiwa.

“Hata nilipohamishiwa katika Gereza la Morogoro na baadaye Ukonga, kote huko nilikuwa nawasiliana na viongozi wa gereza nikiwaomba wanipeleke hospitali, sikufanikiwa hadi nilipoachiwa huru,” alisema Ponda.

Aliishauri serikali kuwajali mahabusu na wafungwa kwa kuwapa huduma bora hasa matibabu kwa kuwa ni haki yao.

“Huko magereza hali ni mbaya, watu wanaumwa na kwa sababu hawapati tiba haraka ugonjwa unakua na kama unaambukizwa, watu wanaambukizana, hakuna anayewajali kwa matibabu,” alisisitiza.