WACHEZAJI WAPIGWA RISASI TEMEKE

Pichani juu ni mabaki ya gari la mhandisi wa Shirika la ndege la Precision  Air  lililochomwa na raia  wenye hasira  baada ya kufyatulia risasi wachezaji hao.

NA MIKA NDABA

JESHI la Polisi Mkoa wa Temeke linamshikilia mtu mmoja anayedaiwa kuwa ni Mhandisi wa Shirika la Ndege la Precision Air, Bathromeo Ngeleja baada ya kuwapiga risasi wachezaji wawili wa mpira wa miguu.

Ngeleja alifanya tukio hilo jana jioni maeneo ya Mashine ya Maji, wilayani Temeke jijini Dar es Salaam, baada ya mpira wa 'gozi' kuingia ndani ya uzio wa nyumba yake.

Tanzania Daima Jumapili lilifika eneo la tukio na kushuhudia nyumba ya Ngeleja ambayo ni mali ya Shirika la Majisafi na Majitaka Dar es salaam 'DAWASCO' ikiwa imealibiwa na gari lake kuchomwa moto na wananchi wenye hasira.

Waliopigwa risasi ni kocha na msemaji wa timu ya Dabani F.C Juma Yusuph na mchezaji wake Abdallah Anachu.

Akizungumza jama Kocha Yusuph alisema kitendo walichofanyiwa ni cha kinyama kwa sababu hawakuwa na nia mbaya isipokuwa walifuata mpira wao baada ya kuingia kwenye uzio wa nyumba ya Ngeleja.

Alisema siku hiyo, alikuwa na timu yake karibu na nyumba ya Ngeleja wakijiandaa kuingia uwanjani, lakini kwa bahati mbaya mpira wao uliingia ndani ya uzio nyumba ya mzee huyo.

"Nilimtuma mchezaji wangu akafuate mpira, lakini wakati anataka kuchukua ghafla tulisikia mlio wa risasi ambao ilimpata mbavuni,"alisema.

Baada ya tukio hilo, alimkimbilia Anachu ili aweze kumuokoa lakini ghafla na yeye alijikuta akipigwa risasi ya mkono.

"Nashukuru mungu naendelea salama, lakini mwenzangu bado hajaruhusiwa kwasababu aliumia sana na yupo Hospitali ya Temeke lakini anaendelea vizuri,"alisema.

Naye Mwenyekiti wa Mtaa huo, Seleman Mpoyo alisema analaani tukio hilo la kinyama na kulifananisha na matendo ya kigaidi.

"Katika hali ya kawaida mtu mwenye akili huwezi kufanya jambo hilo, isitoshe wale wachezaji walikuwa katika hali ya furaha ya kawaida tu, pia yeye mwenyewe ni mkazi wa eneo hili kwanini afanye hivyo? "alihoji.

Hata hivyo, Mpoyo alisema Ngeleja amekuwa na tabia ya kupiga risasi hovyo na kupasua mipira ya wachezaji kwa kutumia risasi pindi inapoingia ndani ya uzio wa nyumba yake.

Mmoja wa Polisi aliyekuwa akituliza ghasia katika eneo hilo, alisema matukio kama hayo yanaibua hasira kwa wananchi na kuamua kujichukulia sheria mkononi.

"Huyu mzee labda akapimwe akili kwa sababu jana wakati tunamuokoa alikuwa anacheka, isitoshe sisi wenyewe silaha zilituishia na idadi ya wananchi ilikuwa kubwa mno zaidi ya watu 200 walituzingira unafikiri ingekuaje? alihoji.