LENDI AITOSA MSONDO NGOMA

 Kiongozi wa bendi ya Msondo, Saidi Mabela (kulia) akimkabidhi Saxaphone msanii  Shabani Lendi   baada ya kuingia mkataba wa miaka miwili akitokea bendi ya Sikinde katikati ni Meneja wa bendi hiyo Saidi Kibiriti.Mapema Jumatatu ya wiki hii.

SIKU chache baada ya bendi ya Msondo Ngoma kutangaza kumnyakua mpuliza saxophone mkongwe wa bendi ya Mlimani Park Orchestra, Shabani Lendi, mwanamuziki amerejea katika bendi yake zamani baada ya kushindwa kupewa dau walilokubaliana.

Akizungumza jijini Dar es Salaam leo , Lendi, alisema, alifanya uamuzi wake kujiunga na Msondo kwa hiyari yake mwenyewe akiwa na makubaliano ya kiasi kadhaa cha fedha na maseneta na uongozi wa bendi hiyo lakini hadi jana walikuwa wakimzungusha kumtimizia walichokubaliana.

Hivyo basi kutokana na sintofahamu kati yao ameamua kubwaga manyanga na kubeba mabegi yake na kurudi katika bendi yake ya zamani  Sikinde 'Nginde' na  kuitumia bendi hiyo ambapo  leo usiku  anatarajia kupanda jukwaani kwenye ukumbi wa Breakpoint  ulioko Makumbusho ambako bendi  ya  Mlimani Park hutumbuiza kila Ijumaa baada ya kuona hali  hiyo ya shengesha ikiendelea kwa siku kadhaa.

Alifafanua kuwa kwa sasa ataendelea kuwa na wana Nginde mpaka hapo kitakapoeleweka kwa yeye kukabidhiwa fedha walizokubaliana wahusika sambamba na maseneta wa bendi hiyo.