MSONDO KUTUMBUZA TCC EID EL FITR

BENDI kongwe ya muziki wa dansi ya nchini, Msondo Ngoma ‘Mambo Hadharani’, imeamua kutoa zawadi ya Idd el Fitri kwa mashabiki wake wa jiji la Dar es Salaam, itakapotumbuiza siku ya Idd el Fitri kwenye viwanja vya TCC Chang’ombe jijini.Akizungumza na mwandishi wa habari hizi jijini juzi Katibu wa bendi hiyo Said Kibiriti, alisema kuwa, bendi hiyo itatoa zawadi hiyo katika onyesho hilo litakalofanyika mchana kwenye viwanja vya TCC Chang’ombe.Kibiriti alisema kuwa baada ya onyesho hilo bendi hiyo itaondoka usiku kuelekea Mikoa ya kusini mwa Tanzania ambako itatumbuiza kwenye miji ya Mbeya na Songea.“Msondo Ngoma tumeamua kuwapa zawadi ya Idd el Fitri wapenzi wetu wa jijini Dar es Salaam, ambapo tutafanya onyesho la bure mchana wa Idd mosi kwenye viwanja vya TCC Chang’ombe jijini Dar es Salaam na usiku tutaondoka kuelekea Mbeya ambako tutatumbuiza Idd pili na Idd tatu tutakuwa Songea,” alisema Kibiriti.Alibainisha kuwa baada ya maonyesho hayo ya sikukuu ya Idd, bendi hiyo itaingia Studio kutengeneza nyimbo za albamu yao mpya wanayotarajia kuiingiza sokoni hivi karibuni.