Q-CHIEF ARUDI KAZINI

Mwanamuziki  wa muziki wa kizazi kipya, Aboubakar Katwila ‘Q-Chief’ picnani juu, amesema anamshukuru  Mungu amerudi tena katika wigo wa muziki wa kizazi kipya huku akipania kufanya makubwa.

Q-Chief alisema hayo jana wakati akizungumza katika mkutano na waandishi wa habari uliofanyika kwenye Ukumbi wa Mikutano wa  Idara ya Habari (MAELEZO), jijini Dar es Salaam.

Msanii huyo ambaye alipotea katika anga ya muziki kwa muda, amesema licha ya kuwa kwake nje ya muziki kwa muda mrefu, yupo vizuri kwani alikuwa akisoma na kuangalia soko linahitaji kitu gani.

Aidha, leo anatarajiwa kuzindua albamu zake mbili alizorekodi nchini Afrika Kusini, akisema ni zenye ubora wa hali ya juu na kuwasihi mashabiki wampokee kwa mikono miwili.

Chilla amesema hivi sasa amerudi katika fani huku akimuahidi Meneja wake, Mhonda kuwa atakuwa na nidhamu, mchapa kazi na mapito yake yote ya zamani ambayo alikumbana nayo mashabiki wasimhukumu, wamuangalie Chilla wa sasa.

Chilla leo jioni  Alhamisi atakuwa na sherehe fupi ya kutambulisha video  zake mbili ambazo amezirekodi nchini Afrika Kusini   katika Hoteli ya City Style  na baada ya hapo atakusanya maoni kutoka kwa wadau kuhusu video zake mbili ambazo ni ‘For You’ na ‘Power of Love’, ambazo amezitengeza chini ya uongozi wa Apex  Group of Companies Limited  huku akisimamiwa na Meneja Julius Mhonda.

Mhonda aliweka wazi kwamba yeye hana anachotegemea kupata kutoka kwa Chilla, kwani anamsaidia tu, hiyo ni kutokana na kuona kipaji cha msanii huyo kikipotea, hivyo ameamua kumsimamia ili arudi katika chati kwani yeye anafurahi kuona kwamba anasaidia wasanii ili waweze kutimiza njozi zao na hayuko kwa wasanii kwa sababu ya fedha.

Chilla alitoka na wimbo ambao aliihusisha familia yake, ambapo aliweka wazi maisha ya familia yake na kutoka na wimbo ambao ulitamba sana ‘Si ulinikataa’, ambapo ilidaiwa alimuimba baba yake mzazi.