BOB JUNIOR KUACHIA ALBAM

 Na  Janeth Jovin

Mwimbaji  na mtayarishaji wa muziki, Bob Junior, amesema yu mbioni kuachia albamu yake mpya itakayokwenda kwa jina la ‘Ukweli Wangu’.

Akizungumza jijini Dar es Salaam, Bob Junior, alisema mbali ya albamu, pia ataziachia nyimbo kadhaa alizomshirikisha msanii wa muziki wa kizazi kipya, Khalid Mohamed ‘TID’ na Shaa.

Alisema baada ya kuona ameshindwa kumpata msanii wa muziki kutoka nchini Uganda, Jose Chameleon, ili kushuti video ya wimbo aliyomshirikisha, ameamua kujikita katika  maandalizi ya albamu yake.

“Unajua bado tunapishana ratiba na Chameleon, nimeamua kuandaa kwanza albamu yangu ambayo inazungumzia zaidi maisha yangu, itakuwa na nyimbo 8 au 10. Ila kabla ya kutoka nina kolabo mbili ambazo naanza kushoot video zake wiki ijayo,” alisema.

Aidha, alisema kwa ubora wa kazi zake ukiwemo wimbo wa ‘Bado Bado’ aliofanya na Shaa na ‘Niguse’ aliofanya na TID, mashabiki wake wakae mkao wa kula.