CHID BENZI AKIRI KUTUMIA 'BWIMBWI'

 Msanii Chid Benz akiingia katika Mahakama ya Kisutu

 
NA MIKA NDABA

MSAANI wa muziki wa Hip hop nchini, Rashid Makwiro ‘Chid Benzi’ jana amekiri kutumia dawa za kulevya katika Mahakama ya Hakimu Mkazi Kisutu, baada ya kuomba asomewe mashtaka yake upya.

Awali kabla ya kusomewa mashtaka yake, mbele ya Hakimu Mkazi, Warialwande Lema, wakili wa seikali Diyana Lukondo alieleza kwamba kesi hiyo ipo kwa ajili ya kutajwa na kuomba kupangiwa tarehe nyingine.

Baada ya kutoa maelezo hayo, Chid benzi alinyoosha mkono na kuomba asomewe upya mashtaka yanayomkabili ili aweze kuyajua.

Akimsomea upya mashtaka yake, Wakili Lukondo alieleza kuwa msanii huyo, anakabiliwa na mashitaka matatu ya kupatikana na dawa za kulevya aina ya Bangi na Heroin Hydrochloride na vifaa vinavyotumika katika uvutaji wa dawa hizo.

Alieleza kwamba mnamo Oktoba 24, mwaka jana, Chid Benzi alikutwa na madawa hayo yenye thamani ya sh.40, 358 kwenye Uwanja wa Ndege wa Kimataifa Julius Nyerere(JNIA) jijini Dar es Salaam.

Baada ya kusomewa mashtaka hayo, Chid alikiri kuhusika na kitendo hicho.

Hakimu Lema aliahirisha shauri hilo hadi Februari 23, mwaka huu, kwa ajili ya kusomewa mashtaka ya awali(PH).

Hakimu Lema alisema kuwa dhamana ya mshtakiwa huyo bado inaendelea.