WEMA SEPETU , JACK WOLPER NA IRENE UWOYA BIFU KWISHNEI

Wema Sepetu/ Chanzo cha habari Kingkiff blogspot.com

MASTAA Wema Sepetu na Irene Uwoya ambao walitangaza bifu dhidi ya staa mwenzao Jacqueline Wolper Massawe wamepatana, Risasi Mchanganyiko linashuka kifua mbele.

Mama msanii na noti zake, Husna Posh ‘Dotnata’ ndiye aliyefanikisha mastaa hao kumaliza bifu katika kikao kilichochukua nafasi hadi usiku wa manane. Tukio la upatanishi, lilifanyika kwenye sherehe ya kuzaliwa ya Uwoya, iliyofanyika mwishoni mwa wiki iliyopita kwenye bustani iliyopo Tangi Bovu, Mbezi Beach, Dar es Salaam.

Kikao cha usuluhishi kilikuwa ‘sapraizi’, kwani waalikwa wote, walifika eneo hilo kwa ajili ya kufurahi na Uwoya na kumpongeza kwa kutimiza miaka kadhaa ya kuzaliwa kwake aliyoomba isitajwe.

ILIVYOKUWA

Sherehe ilianza saa 6:00 usiku kwa kufungua shampeni kisha ikakatwa ndafu, iliyoliwa na kila aliyehudhuria. MC wa shughuli hiyo, Steve Nyerere, alitangaza tukio la Uwoya kumlisha ndafu Wolper, jambo ambalo liliwashtua wote waliohudhuria. Baada ya tangazo hilo, Wolper alisogea mbele, akalishwa ndafu na Uwoya kisha mastaa hao, wakatazamana, wakatabasamu mwisho wakakumbatiana.

Hali ya Uwoya na Wolper kukumbatiana, iliamsha shamrashamra kemkem kwa ukumbi mzima kulipuka kwa mayowe. Kutokana na mafanikio ya tukio hilo, Dotnata aliwaita Wolper na Wema ili nao wamalize tofauti zao, jambo ambalo lilizua utata. Wema aliweka ngumu kumaliza bifu lake na Wolper kwa maelezo kuwa anahitaji muda zaidi kutafakari na kufanya uamuzi.Hata hivyo, busara za Dotnata, zilimtuliza Wema ambaye naye alifungua kifundo chake moyoni na kukubali kumaliza tofauti zake na Wema.

Baadaye ukumbi mzima ulitaarifiwa kuhusu suluhu ya Wema na Wolper kisha wote wakashuhudia mastaa hao wakikumbatiana.

Katika kuonesha kwamba kweli wameamua kusameheana na kuwa kitu kimoja, kwa nyakati tofauti wasanii hao walikumbatiana na kupeana mabusu, jambo lililoamsha shangwe zaidi ukumbini humo.

CHINI YA ZULIA

Habari zinaeleza kuwa Wolper na Uwoya ilikuwa rahisi kupata suluhu kwa sababu waliketishwa usiku wa manane, siku moja kabla ya sherehe hiyo.

Ilielezwa kuwa Uwoya alipopeleka mwaliko wa sherehe yake kwenye Klabu ya Bongo Movie, alikutana na Dotnata ambaye alitoa rai ya kuwepo kwa suluhu na mwenzake Wolper. Inaelezwa kuwa kutokana na wazo hilo kuafikiwa na kila upande, Dotnata aliwaketisha Wolper na Uwoya kisha wakamaliza tofauti zao, hivyo wao waliingia kwenye sherehe wakiwa hawana tofauti.

WASEMAVYO WAHUSIKA

Wema alisema baada ya kupatanishwa kuwa yeye hana bifu na anapenda kumaliza mwaka vizuri. “Napenda mwaka ujao niuanze vizuri, sitaki tena mambo hayo kwa kuwa jina langu lina maana ya upendo na furaha na siyo kuwekeana vinyongo,” alisema Wema. Uwoya alipopata nafasi ya kuzungumza, alisema anachosisitiza ni upendo. “Mengi ameongea Wema mimi kwangu one love sina tatizo na mtu yeyote yule,” alisema Uwoya.

Wolper yeye alimshukuru Wema kwa kuzungumza maneno mazuri kutoka moyoni na siyo ya udanganyifu. Alisema: “Wema ameongea kitu ambacho amekitoa moyoni mwake na si cha kudanganya, nimefurahi sana kumaliza hili bifu na Mungu asaidie tuendelee hivi.” Maneno ya mastaa hao, yalifuatiwa na makofi, miruzi na aina mbalimbali za maneno ya kuwashangilia kutoka kwa wahudhuriaji wengine.

OFF RECORD
Katika maneno ya mmoja wao, alisema kwamba yupo mtangazaji mmoja anayesababisha wao wagombane. Akionesha kukerwa, msanii huyo alisema: “Kuna mtangazaji anatugombanisha ili kukuza kipindi chake. Najua humu ndani kuna watu wa magazeti…msininukuu, ni off record…nalisema hili kwa ajili yetu wasanii maana…” alisema.

WIKI ILIYOPITA
Wema na Uwoya, walizungumza kupitia televisheni moja nchi kuwa, Wolper ni mnafiki na hawampendi.

Mastaa hao walimchambua Wolper kama mtu mgeni mjini ambaye hana ujanja wowote.

Katika tuhuma zao, wasanii hao walisema kuwa Wolper amekuwa akiingilia uhusiano wa watu na kuzungumza uchonganishi.

Kabla ya hapo, Wema alikuwa kwenye bifu na Wolper, akimtuhumu kuingilia uhusiano wake na aliyekuwa ‘boyfriend’ wake, Naseeb Abdul ‘Diamond’