POLISI PWANI WAMEMNASA MSAMBAZAJI PICHA CHAFU SHULE YA BAOBAB

Kamishna Msaidizi  wa Polisi ACP  Salim Morcase akifafanua jambo mbele ya Waandishi wa Habari hawapo pichani leo tarehe 20 Januari  2025.

Kibaha ,Pwani

Jeshi la Polisi Mkoa wa Pwani  linamshikilia  mtu mmoja (jina kapuni) kwa kosa la  kusambaza  picha  mjongeo kwenye mitandao ya kijamii  kwa  lengo la kuichafua Shule ya Sekondari BAOBAB  iliyopo Wilayani  Bagamoyo Mkoani Pwani.

 Akizungumza  na Waandishi  wa Habari  leo tarehe 20 Januari  2025 kwenye mkutano uliofanyika katika ukumbi wa mikutano  uliopo ofisini kwake  ACP  Salim Morcane amesema kuwa  Januari  3 ,2025 walipokea  malalamiko  kutoka  kwa uongozi wa  shule  ya Baobab  kuhusu kusambazwa picha  chafu  katika mitandao  ya kijamii picha za mjongeo za utupu na zenye maudhui  machafu kimaadili na kinyume  na sheria  za nchi.

"Picha  hizo chafu na zisizo  na maadadili  imebainika kuwa  waliotengeneza  waliunganisha na baadhi ya majengo  ya Shule ya Baobab  ili kuaminisha  umma  kuwa  vitendo hivyo  vinafanyika shuleni hapo" amesema Kamanda Morcane.

RPC Morcane amesema kuwa  Jeshi la Polisi Mkoa wa Pwani  limefanya  uchunguzi  na limefanikiwa kumkamata mtu mmoja  ambaye  uchunguzi wa kitaalam umesaidia kumfikia na kumkuta  na picha hizo pamoja  na kifaa cha kieletroniki ambacho alikuwa akikitumia  kusambaza picha hizo chafu.

ACP Morcane amesema  kuwa Jeshi la Polisi Mkoa wa Pwani linaendelea kuwasaka  watu wengine waliohusika katika kutengeneza  na kusambaza picha hizo mjongeo.

RPC Morcane amesema kuwa  Jeshi la Polisi Pwani  wanatoa onyo  kwa watu  wenye tabia  kama hizo  za kutengeneza  na kusambaza picha  kama hizo  kwa malengo  ya kuchafua wengine au  taasisi kwani mkono wa sheria lazima  utawafikia na hata  kama  hautawafikia mapema  wataendelea kupata  shida ya kujificha  na kuacha  kufanya  shughuli zao za kujiletea maendeleo.

 Wakati huohuo  Mkurugenzi wa Taasisi ya Baobab  Shani Khalfan Swai  amesema  kuwa taarifa hizo zimewaathiri kwa kiasi  japo muitikio wa wazazi  kupeleka  wanafunzi Shuleni  hapo ni mkubwa.

Wakati huohuo  Mkurugenzi huyo amesema  kuwa  kusambaa kwa picha hizo chafu za mjongeo  ziliwapa taharuki kubwa  wao uongozi wa shule  pamoja na wazazi kwani simu zilikua za moto jambo lililowafanya waamue kukaa kimya huku wakitafakari njia sahihi ya kujisafisha  na kubainisha ukweli  ndipo walipotoa taarifa kwa Jeshi la Polisi Mkoa wa Pwani ambao wanauwezo wa kufanya uchunguzi  na jambo la kushukuru kwa upande wao waliposikia mtu mmoja mwenye nia ovu anashikiliwa na Jeshi hilo huku uchunguzi ukiendelea. 

Swai ameongea  hayo leo kwenye mkutano  na Waandishi wa Habari waliofika Shuleni hapo.

"Sisi Baobab  tunaimani kubwa na Jeshi la Polisi kwamba wataisafisha Taasisi  yetu iliyochafuliwa" amesema Shani.

"Wazazi wa wanafunzi walipatwa na taharuki  wengi walipiga simu kuhitaji kupewa ufafanuzi  na sisi tuliwafafanulia kwamba hakuna tabia chafu hapa shuleni kwetu na hata zile picha mjongeo wale siyo wanafunzi wetu japo kuna picha za mahafali  ambazo mdukuzi alizidukua kwenye kurasa zetu za mitandao ya kijamii na  akaunganisha.

Mkurugenzi wa Taasisi ya Baobab Shani Khalfan Swai  watano  kutoka kushoto  akiwa kwenye picha ya pamoja na Viongozi wengine wa Taasisi hiyo.