SITTI MTEMVU AJIVUA RASMI TAJI LA MISS TANZANIA 2014

ALIYEKUA Redds  Miss Tanzania Sitti Abbas Mtemvu ametamka rasmi kuvua taji hilo ambalo alilitwaa 0ktoba 11 mwaka huu kwenye fainali za shindano zilizofanyika kwenye ukumbi wa Mlimani City Dar es Salaam.

Katika barua iliyoandikwa na Sitti kwenda kwa Kamati ya Miss Tanzania Sitti alisema  hivi: Sitti Abbas Mtemvu S.L.P 60 151 Dar es Salaam 5.Novemba 2014.

Mkurugenzi Lino International Agency Limited Dar es Salaam, Yah:Kuvua  taji la Miss Tanzania 2014.

Ndugu Mkurugenzi  tafadhali husika  na kichwa cha habari hapo juu, “Mimi Sitti Abbas Mtemvu, baada ya kutwaa taji la urembo la Miss Tanzania mwaka 2014 kumezuka  shutuma  mbalimbali dhidi yangu .Wameniwekea  maneno  mengi sana  mdomoni  kwamba nimesema wakati siyo”.

Shutuma hizo  zimeandikwa  katika vyombo mbalimbali vya habari , Blogs na Mitandao ya Kijamii, kiasi ambacho naona inaweza hata  kuhatarisha  maisha yangu.

Sasa  kwa hiari yangu  mwenyewe tena  bila  kushawishiwa  na mtu  na  kwa kulinda  heshima yangu  pamoja  na familia  yangu  natamka rasmi kuvua  taji la urembo  la Miss Tanzania 2014.

“Napenda  niwashukuru  wale wote  waliokuwa wakinipa  sapoti tangu mwanzo nilipoingia katika mashindano  haya katika  ngazi ya Taifa , nao ni warembo wote wa Chang’ombe, Temeke, pamoja  na wote tuliokuwa nao katika  fainali za Taifa.

Pia napenda  kutuma shukrani   za dhati kwa Waandaaji wote wa kituo cha Chang’ombe, Temeke na Wajumbe  wa Kamati ya Miss Tanzania  kwa mafunzo mbalimbali niliyoyapata.

Nawashukuru pia waandishi wa habari wote kwa mchango wenu , pamoja  na Wizara ya Habari , Utamaduni na Michezo na Baraza la Sanaa la Taifa kwa busara zenu.

Sitti anamaliza kwa kusema “Leo nalivua rasmi  taji  nililopewa na binadamu lakini  taji alilonipa Mweyeezi Mungu  bado ninalo, mwisho naomba radhi  Watanzania wote kwa uamuzi huu niliouchukua.

Naye Hashim Lundenga akizungumza mbele ya waadishi  wa habari katika mkutano  uliofanyika  kwenye hotel ya JB Belmont alisema kwamba wamepokea barua hiyo  Novemba 6 na wana heshimu uamuzi wa Sitti.

“Tumepokea barua  ya Sitti  hivyo nafasi yake itachukuliwa na aliyekuwa shindi wa pili Lilian Kamazima ambaye ni Miss Arusha pia Miss Kanda ya Kaskazini” alisema Lundenga.

Akijibu  swali kuhusu zawadi ambazo ni  kitita cha sh. Mil 18 , alisema hivi sasa ni mapema mno kujibu suala hilo hivyo taratibu za kiofisi zitafuatwa na watatoa tamko.

Kamazima alisema kwamba anafurahia kupata nafasi hiyo ya kuwa Miss Tanzania  hivyo ataanza kwa kujipanga na kufanya kazi za kijamii ikiwa ni sehemu ya maandalizi yake ya kuiwakilisha nchi kwenye shindano la kumtafuta mrembo wa dunia litakalofanyika mwakani.