SITTI ABBAS MTEMVU ALING'ARA REDD'S MISS TANZAZIA 2014

15 Bora wa Redds Miss Tanzania 2014

Warembo walioingia katika Tano Bora kwenye Shindano la Redd's Miss Tanzania 2014.

Redd's Miss Tanzania Soitti Mtemvu akiwa na baba yake mzazai Abbas Mtemvu Mbunge wa Temeke mara baada ya kutwaa taji hilo.

NA MWANDISHI WETU

MREMBO Sitti Abbas Mtemvu (23), kutoka Temeke, Jumamosi usiku alitwaa taji la Redd’s Miss Tanzania 2014, baada ya kuibuka kidedea kwenye fainali za shindano hilo lililofanyika katika ukumbi wa Mlimani City jijini Dar es Salaam.

Sitti ambaye ni mtoto wa Mbunge wa Temeke, Abbas Mtemvu alitangazwa kuibuka kidedea kwenye shindano hilo na Mkurugenzi wa Lino Investment Agents waandaaji wa shindano hilo, Hashim Lundenga na kuwabwaga walimbwende wengine 29 walioshiriki shindano hilo na kurithi taji kutoka kwa Happiness Watimanywa ambaye alitwaa taji hilo mwaka jana.

Katika shindano hilo lililoanza majira ya saa 4:00 usiku wa kuamkia jana, lilishuhudia warembo wote 30 wakitoa shoo kali ya ufunguzi kabla ya kupita jukwaani wakiwa na mavazi ya kubuni, ufukweni na vazi la usiku kabla ya kutangazwa kwa 15 bora, huku Sitti akionekana kuwa na sapoti kubwa jukwaani.

Baada ya kutangazwa kwa 15 bora washiriki walioingia tano bora walitangazwa na kila mmoja kuulizwa swali lake huku huku Sitti akitumia lugha ya Kifaransa na Kiingereza kujibu swali aliloulizwa

Nafasi ya pili kwenye shindano hilo lililopambwa na burudani kutoka kwa Vanessa Mdee na Ommy Dimpoz, ilikwenda kwa Lillian Kamazima, huku mrembo wa Ilala Jihhan Dimachk akishika nafasi ya tatu, Dorice Mollel na Nasreem Abdul walishika nafasi ya nne na tano.

Akizungumza baada ya mwanaye kutangazwa mshindi wa Redd’s Miss Tanzania, Mtemvu alisema kuwa anaamini Sitti ataendelea na masomo baada ya kumaliza masuala ya urembo kwa sababu alimuahidi hivyo na pia aliongeza kudai kuwa Sitti anaweza kutumia taji hilo kuendeleza taasisi ya Mtemvu Foundation ambayo inasaidia vijana waliokwenye mazingira magumu.

Kwa upande wa wake Sitti alisema kuwa moja ya vitu vilivyompa ushindi kwenye kinyanganyiro hicho ni uwezo wake wa kuzungumza lugha tatu, huku akikiri kuwa upinzani ulikuwa mkali kwa sababu warembo wote walikuwa na vigezo vya kushinda.

Mshindi wa shindano hilo anajinyakulia kitita cha shilingi milioni 18 na kuiwakilisha Tanzania kwenye mashindano ya dunia, huku mshindi wa pili akinyakua shilingi milioni 6, mshindi wa tatu milioni 4.2 na washiriki wengine wanapata kifuta jasho cha shilingi laki 7 kila mmoja.