MAHAFALI YA MIAKA 18 KATIKA 'GAME' MwanaFA KUFANYIKA MEI 31

MWANAMUZIKI msomi pichani kulia , anayetajwa kuwa mwanamuziki wenye tungo zinazozusha misemo mingi mitaani, Hamis Mwinjuma, au Mwana FA ametaja sababu ya kuliita onesho lake Litakalofanyika a Ijumaa hii kuwa maridhawa (The Finest) kwani ni maadhimisho ya miaka 18 ya muziki wake ambao iwapo ungekuwa ni uhai wa binadamu, basi angekuwa ameingia katika hatua ya utu uzima.

MwanaFA aliyasema hayo wakati alipoongea na baadhi ya waandishi wa habari za burudani kuhusiana na tamasha lake hilo ambalo mwenyewe analichukulia kama mahafali ya muziki wake kwani amepitia mambo mengi sana mpaka kufikia hatua ya kuitwa MwanaFA.

"Nitaeleza kila kitu katika tamasha hili na hata kuhusiana na tamasha langu la kwanza kupanda jukwaani huko Tanga, na nakumbuka mpaka nguo nilizovaa siku hiyo, na mambo mengi watu watayapata kwa ufasaha kuhusiana na mimi, hata hizi tetesi tetesi miongoni mwa mashabiki ntazijibu", alisema MwanaFA.

Sababu nyingine aliyoitoa kuhusiana na ‘The Finest’ ni kuhusiana na fursa kwa mashabiki wa muziki wa Hip Hop sasa kupata nafasi ya kuhudhuria maonesho ya muziki huo yenye mtazamo wa kistaarabu, tofauti na ilivyozoeleka.

Amesema kwa kipindi kirefu sasa imekuwa ikiaminika kwamba Hip Hop ni muziki wa kihuni na wanaohudhuria muziki wa aina hiyo wanaitwa masela na hata mavazi yao huwa ni filana na masuruali makubwa, na viatu vikubwa jambo ambalo sasa linatakiwa kuondoka katika nafsi za watu kwani muziki umeshakuwa biashara.

Ameieleza imani yake ya kwamba anaamini kuna watu na heshima zao wanaupenda muziki huu lakini kutokana na mazingira wamekuwa wakikosa fursa ya kuushuhudia jukwaani na hii ndio nafasi yake pekee.

MwanaFA anaamini kwamba Hip Hop ni muziki wa kimataifa unaopatikana katika kila taifa tofauti na aina nyingine za muziki, ukiachilia mbali reggae.

Akatoa mfano wa kundi la Wu Tang Clan ambalo hufanya ziara zake mpaka China na kujaza mashabiki kiasi cha kuhatarisha usalama.