MASHAIZI CLASSIC NA DOGO ASLAY MKESHA WA MWAKA MPYA

Kundi mahiri la muziki wa taarab nchini Mashauzi Classic lenye maskani yake jijini Dar es Salaam, limeandaa shoo kabambe ya mkesha wa mwaka mpya 2012 ambayo itaufanya usiku huo kuwa maalum kwa wapenzi na wadau wake kuuaga mwaka 2011 na kuukaribisha mwaka mpya 2012.

Shoo hiyo inayotajwa sana midomoni mwa wapenzi hivi sasa, itachukua nafasi kwenye ukumbi wa Gaza Strip, Kiwalani jijini Dar ambapo pia mwanamuziki mkali wa Bongo Fleva Dogo Aslay atatumbuiza.

Mkurugenzi wa bendi ya Mashauzi Classic Isha Ramadhani, amesema kuwa, wameamua kumjumuisha Dogo Aslay kwa kuthamini vipaji vipya vinavyochomoza na kuvienzi kwa kuvistawisha kama msanii mwenyewe anavyong'ara na wimbo wake mzuri 'Nakusema '.

"Katika shoo hiyo ya kukata na shoka, tutaporomosha nyimbo zote kali za albamu zote mbili na mpya zingine huku Dogo Aslay naye akihanikiza kwa nafasi yake. Hakika sio shoo ya kukosa kama kweli u mdau mzuri wa taarab, kila kizuri kitakuwa hapo," akasema Isha.

pichani kulia ni Bibie Isha Mashauzi.

Habari hii imetumwa na Kaka Mwinyi