TAMASHA LA ANTI VIRUS LATIKISA DAR ES SALAAM

Na Ruhazi Ruhazi

MBUNGE wa Mbeya mjini Joseph Mbilinyi ‘Mr II’, Sugu (CHADEMA) usiku wa Jumamosi iliyopita aliwakuna mashabiki wa muziki wa Hip hop aliposema yeye sio muheshimiwa Mbunge, bali ni mchizi wao Sugu.

Kauli hiyo aliyoitoa katika tamasha aliloliandaa la Burudani kwa Mashabiki, lililofanyika kwenye viwanja vya Chuo cha Ustawi wa Jamii, Kijitonyama jijini Dar es Salaam, lilisababisha kuripuka kwa shangwe kwa mashabiki.

Sugu aliishiwa na maneno alipotaka kuwashukuru mashabiki waliojitokeza hali inayoonekana ni kutokana na kuchanganyikiwa baada ya kupata tena nafasi ya kukutana na mashabiki wake, ambao walikuwa wameujaza uwanja huo tofauti na matarajio yake.

“Ndugu zangu nawapenda sana, mimi sio mheshimiwa mbunge jukwaani sawa bwana, hapa mimi ni mchizi wenu Sugu, sema wote Sugu…, hivi kuna Dk. Slaa hapa? Au watu wote mmekuja kumuona Sugu na kweli leo Hip Hop inazaliwa upya Bongo sio, Nov 26 Ustawi wa Jamii ni Tahriri ya Bongo Fleva,” alisema Sugu na kuongeza.

“Anti Virus, Anti Virus …, Dj zuia kwanza, kwa umati huu naamini hakuna Marketing Manager ambaye atatunyima udhamini mwakani, nimefarijika sana naona kuna wengine mmenunua kitabu cha maisha ya Sugu hebu inueni juu wavione,”.

Baada ya hapo Sugu akaanza kuimba wimbo wake uliotamba ‘Wananiita Sugu’, kisha akapandisha mistari ya wimbo ‘Anti Virus’ kisha akapiga ‘Hawataki Niwe Nawe’, ‘Ana Miaka chini ya 18’, ‘Yamenikuta’,’ Hayakuwa Mapenzi’.

Wakati akipiga wimbo wake ‘Mambo ya Fedha’, wabunge John Mnyika (Ubungo), Hines Kiwia (Ilemela) na Regia Mtema (Viti Maalum), walipanga jukwaani kuungana naye jambo lililomgusa sana Sugu na kuzidi kushusha mistari.

Wasanii na vikundi vilivyopagawisha juzi ni Isanga Family, Daz Nundaz, Gangwe Mob, Mapacha, ‘Sister P’, ‘Zay B’, ‘Nurueli’, ‘Danny Msimamo’, ‘Rama D’, ‘Adili’ lakini funga kazi ilikuwa kwa Suma G na Vituko vyake vya Uswahilini na ‘Soggy Doggy au Chifu Rumanyika’ na visa vyake vya ‘Kibanda cha Simu’.

Soggy Doggy Hunter Chifu Rumanyika akiwa jukwaani.

Msanii wa Hip Hop II Proud au waweza kumwita MR.SUGU akipewa sapoti na Mbunge wa CHADEMA Jimbo la Ubungo John Mnyika katika uzinduzi wa tamasha la Anti Virus.

Mbunge wa Mbeya Mjini Joseph Mbilinyi a.k.a Mr. SUGU ambaye pia ni msanii wa miondoko ya Hip Hop akiwa jukwaani katika tamasha la Anti Virus lililofanyika usiku wa Jumamosi katika viwanja vya Chuo Cha Ustawi wa Jamii Dar es Salaam.(Picha zote na Francis Dande)